Do Uilleam MacMhathain

MhicMhathain, ’s tusa a’ chairt-iùil
air gach linnidh shean is ùir
a sheòladh saothaichean ar rùin.

Thàinig thusa ro Chaol Ìle
a dh’innse mu luingeas Cairistìona,
agus bha thu ri port Barrach
nuair thug Clann Nèill druim na mar’ orr’
agus nuair thill iad le aighear
a-mach o dhùthaich MhicGill-Eain.

Bha thu ri iorram air ràmh-bràghad
mun robh Niall Odhar faisg fàire,
agus ma dh’iomair fear mar dhithis,
bha thusa ri iorram mar thrithear.

Threòraich thu Mac ’Ain Mhic Sheumais
far an robh Mac mòr a’ Chlèirich,
agus chaidh thu le cois eutroim
is sgeul a bhàis gu mnathan Shlèite.

Ghabh thu ’n rathad a Gheàrrloch
mun robh MacRath an Crò Chinn t-Sàile,
bhlais thu fìon dearg nan amhran
mun d’ òl MacMhathain à Allt Rabhraidh,
agus shloinneadh tu gach àrmann
a sheas air Achadh an Dà Theàrnaidh.

Mun tàinig Leòdach à Lochlann
bha thusa gabhail gu socair
ceithir-thimcheall air gach fonn
an Albainn is air bòrd nan long
a bha tighinn a rèir sgeulachd
à Eilean Mhanainn is à Èirinn.

Thug thu ’n cùrsa a dh’fhòghnadh
do Chalum Sgàire à Leòdhas,
’s bha thu air Mol Steinnseil Stamhain
nuair thug ’Ain Garbh am beum le chlaidheamh
agus dh’aithnich thu san sgreuchail
guth Gormail ’s Cas a’ Mhogain Riabhaich,
agus dè an seòrsa bragail
bha ’m beul Bean Mhòr an Lagain.

Lean thu cùrsa maighdinn-mhara
a-mach à Tìr Mhic Ghille Chaluim
is deas à Tìr Mhic Mhic Ailein,
tro Chaol Mhuile, tro Chaol Ìle,
tro Chaol Othasaigh Mhic-a-phìotha,
agus ged ghabh i air a fiaradh,
a-mach gu ruig an t-Eilean Riabhach,
’s ann bha thu roimhpe nuair a shiar i
gu Tìr Fharsainn nam Fear Fialaidh.

Choisich thu gach raon is sliabh
o Bheinn Dòbhrain gu Bràighe Loch Iall,
chuala tu ceileir am Bràigh Rùsgaidh,
’s ràinig thu fèill Chinn a’ Ghiùthsaich,
chuala tu gliong nan arm a’ bualadh
mu Allt Èireann ’s air Raon Ruairidh.

Bha do chluas giar ris gach othail
a bh’ aca anns a’ Cheastal Odhar
agus cha robh thu anns na cùiltean
ann am Brachlaich an Dùine
‘an àm nan dòrn a bhith gan dùnadh’.

Mhìnich thu dhan Chlàrsair Dhall
dè bh’ aig Mac Alla ’na chainnt.

Bha thu san èisteachd aig gach cuirm
’n Dùn Bheagain, an Dubhaird ’s an Dùn Thuilm,
agus b’ aithne dhut gach iorram
a thugadh dhan a’ Chaisteal Thioram,
agus gach corranach is cumha
chualas o Ròghadal gu Còig Mhumhan,
gach luinneag, Dàn Dìreach ’s Socair Dhàna
san Dùn Aorach ’s an Dùn Sgàthaich,
eadar Brathan is Dùn Àbhart.

Bha thusa meas an òir Ghallaich
a bha deàrrsadh air Bòrd Bealaich,
chunnaic thu leus nan coinnlean geala,
chual’ thu ceòl fìdhle gaoir na mara;
bha thu air tobhtaidh gach bàta
san deach gach Ailean Donn a bhàthadh.